ಗುರುಚರಣದೊಳ್ ದೊರೆವುದು ಮುಕುತಿ

ಕಣ್ಣಂಚಿನಲಿ ಸುಳಿದಾಡುತಿವೆ ಹಲವು ಕಾಮನೆಗಳು

ಸಿದ್ಧಿಯಾಗಲವು ಬೇಡು ಗುರುವಿನ ಚರಣದೊಳು

ನಂಬಿಕೆಯಿಡು ಶ್ರೀಧರನ ಪಾದದೊಳು

ಇಷ್ಟಾರ್ಥ ಈಡೇರ್ವುದು ಮುಚ್ಚಿತೆರೆಯುವುದರೊಳಗೆ ಕಣ್ಣ ಪಟಲಗಳು

ಗುರುವಿನಾದೇಶ ಸಿಗುವರೆಗಿಲ್ಲ ಮುಕುತಿ

ಅವನೊಳಿಡು ಅನಂತ ಭಕುತಿ
ಕೊನೆಗೊಂದು ದಿವಸವದು ದೊರೆವುದಪ್ಪಣೆ

ಅಂದು ಆಗಿರುವುದು ನಿನ್ನ ಮನದರ್ಪಣೆ

                                                       ಪ್ರಣವ 24/03/2012                  

                                                     11:11 P.M. to 11:35 P.M. 

ಮುಸ್ಸಂಜೆಯ ಮರ್ಮ

ಬೀಸುತಿತ್ತು ತಂಗಾಳಿ ಮೆಲ್ಲಗೆ

ಮರೆಯಾಗುತಿದ್ದ ರವಿ ಕಾಣದೆ ಕಣ್ಣಿಗೆ

ಪದ ಹಾಡಿತು ಮನವು, ತಾಳವಿಲ್ಲದೆ

ಸ್ಮೃತಿ ತಪ್ಪಿತು ನನಗೆ ನೀನಿಲ್ಲದೆ

ದೂರದ ಹಸಿರು ಬೆಟ್ಟ,

ತೋರುತಿತ್ತು ಕತ್ತಲಲ್ಲಿ ಕಪ್ಪಾಗಿ!

ಅಂದು ನೀ ಮನದಲ್ಲಿ ನೆಟ್ಟ,

ಪ್ರೇಮಬೀಜವೊಡೆದು, ಹೂ ನೀಡಿತು, ಕೊಡಲು ನಿನಗಾಗಿ

ಪ್ರಣವ 09/04/2012

                                                             

         

ಆಕೆಯಿಲ್ಲದ ಮನ

ಬರಡಾಗುತಿದೆ ಮನ ನೀನಿಲ್ಲದೆ

ಮರಳ್ಗಾಡಾಗುವ ಮುನ್ನ ಹಿಂದಿರುಗು

ಒದ್ದಾಡುವಂತೆ ಮೀನು ನೀರಿಲ್ಲದೆ

ಚಡಪಡಿಸುತಿರುವೆ ನಾ, ನೀ ಬರುವರೆಗು

ಹೆಚ್ಚುತಿವೆ ಹೃದಯದ ಬಡಿತಗಳು

ಕಂಡಂದಿನಿಂದ ಅವಳ ಚೆಮ್ಮೊಗವನು

ಎಲ್ಲೆ ಮೀರಿವೆ ಮನದ ತುಡಿತಗಳು

ನೆನಪಿಸುತಿವೆ ಆಕೆಯ ಮಂದಹಾಸವನು

ಸ್ವಕಪೋಲಕಲ್ಪಿತಳವಳು ಬರುವಳೇನು ದಿಟವಾಗಿ?

ಒಮ್ಮೆ ಬಂದರೆ ಸಾಕು ನನ್ನೆದುರಿಗೆ ನನ್ನ ಪ್ರೇಯಸಿ

ನುಡಿದರದುವೆ ನಲ್ಮೆಯಿಂದ ಕರ್ಣದೊಳು ಹಿತವಾಗಿ
ಆಗಲು ಒಪ್ಪದಿರಳಾಕೆ ನನ್ನ ಮನದರಮನೆಯರಸಿ    
                                                                                      -  ಪ್ರಣವ   
                                                                                                                                                                

ಈ ಮಿಂಚೇಕೆ?

                                                       

ಮಿಂಚುತಿವೆ ನಯನಗಳು ನಕ್ಷತ್ರದಂತೆ

ಕಂಡು ಆಕೆಯ ರೂಪವನು

ಶೇಖರನೊಂದಿಗಿರುವ ರೋಹಿಣಿಯಂತೆ,

ಇರಬಾರದೇ ನನ್ನ ಕನಸಿನ ರಾಣಿ ನನ್ನೊಂದಿಗೆ?

ಚಂದಿರನ ಮೇಲಿರುವ ಕಲೆಗಳನ್ನೇನೆಂದುಕೊಂಡಿರಿ?

ನನ್ನ ಹೃದಯದ ಮೇಲಾಕೆಯು ಒತ್ತಿರುವ ಪಾದದ ಗುರುತುಗಳವು,

ಅದಲ್ಲಿಗೆ ಹೇಗೆ ತಲುಪಿತೆಂಬ ಪ್ರಶ್ನೆ ನಿಮ್ಮದಲ್ಲವೇ?

ಮನದ ಭಾವನಾತ್ಮಕ ಕಲ್ಪನೆಗಳಿಗಿಲ್ಲ ಎಲ್ಲೆ

ನಿಮ್ಮ ಪ್ರಕಾರ ಬೇರೆಯೇನಿರಬಹುದು? ನಾನು ಹೇಗೆ ಬಲ್ಲೆ?

ನಿಮಗಿರಬಹುದುಲ್ಲವೇ ಸಂದೇಹ ಯಾರೀ ನಾರಿ?

ನಾ ವರ್ಣಿಸುತಿರುವ ಪೋರಿ?

ತಿಳಿದಿದ್ದರೆ ಅವಳ್ಯಾರೆಂದು ನನಗೆ,

ಉಲ್ಲೇಖಿಸಿ ತಿಳಿಸುತ್ತಿರಲಿಲ್ಲವೇ ನಾ ನಿಮಗೆ?                                                          

                                                                                                                    

                                                                                                                                                           

                      

                                                                                                                  - ಪ್ರಣವ 20/03/2012

                                                                                                   11:55 P.M to 12:13 A.M (21/03/2012)

ಇದೇನಿದು?

ಮನದಾಗಸದಲಿ ತೇಲಾಡುತಿರುವ ಬಾನಾಡಿ

ಹಾಡುತಿದೆ ಪ್ರೇಮರಾಗವನು

ತಾಳ ತಪ್ಪುತಿದೆ, ಶೃತಿ ಸೇರದೆ

ಕಂಡು ಪುಳಕಿತಗೊಂಡಿದೆ ಮನ, ಮಾಯಾಮೃಗವನು

ನಿನ್ನೆ ಕಂಡ ಸ್ವಪ್ನವಿಂದು ನನಸಾಗುವ ಬಯಕೆ

ಸಾಧ್ಯವಿಲ್ಲವಿದಾದರೂ ಇರಲಿ ನಿನ್ನ ಹಾರೈಕೆ

ಪಡೆಯುವ ಛಲವಿದೆ, ಆತ್ಮವಿಸ್ವಾಸವಿದೆ,

ನನಗಿಲ್ಲ ಹೆದರಿಕೆ ನನಗೆ ನಿನ್ನ ಜೊತೆಯಿದೆ